فولنترجي عمان بتدعم كل انسان .. قصة شرف الدين وفراس وفارس

 

الحمد لله وأخيراً هلأ وبفضل ربنا أول شي وبدعم حبايبنا بنقدر نحكي وبكل فخر وحب أنه " فولنترجي عمان - Volunterje Amman " صارت شركة حقيقية مسجلة ومعتمدة رسمياً من وزارة الصناعة والتجارة، تم تأسيسها رسميا بتاريخ (٦/٦/٢٠١٧) ...

كنا صغار وكان طموحنا كبير كتير ..
كنا صغار وكانت أحلامنا أكبر منا بكتير ..
كنا صغار وكان إيماننا وثقتنا كبار بأنفسنا ..

فارس وفراس وأنا شرف الدين عمرنا 19 سنة، أصحاب وجيران من الصف الثامن يعني تقريبا من ٦ سنين، بلشت تشتد علاقتنا أكتر وطموحنا يكبر أكتر وأكتر من لما بلشنا نرتاد " Innovation Labs - مختبرات الابتكار " تعلمنا القيادة، الريادة، الإدارة، الحب، الثقة بالنفس .. تعلمنا نحلم ونآمن بأحلامنا .. تعلمنا نساعد غيرنا ونكون مصدر للإيجابية والحب .. تعلمنا أنه عنا طاقات وإمكانيات عظيمة لازم نستغلها .. تعلمنا نترك بصمتنا في العالم .. تعلمنا أنه الفشل واليأس مش طريقنا .. تعلمنا أنه القاع مش مكاننا .. تعلمنا نكون مبدعين ورياديين وقادة مش مجرد نسخ عادية من البشر ...

حلمنا بأشياء كتيييير وحققنا منها اللي قدرنا عليه، وكان من أهم أحلامنا هو أنه نحقق هالإنجاز وتصير فكرة "فولنترجي عمان" شركة حقيقية على أرض الواقع .. وهو مشروع بندرج تحته عدد من المبادرات التطوعية، ومن هالمبادرات مبادرة بتبحث عن الأسباب وراء ضعف التعليم في بعض المدارس في مجتمعنا المحلي وبتحاول تتعامل معها وتحلها لتحسين العملية التعليمية.

اليوم، وبعد سنتين من التخطيط والتعب، بعد ما واجهنا كتير من الناس اللي استهانوا فينا وبقدراتنا، بعد ما حاولنا وحاولنا وفشلنا بكتير شغلات لكن ضلينا مستمرين، بعد ما كنا نحس ونقرأ في عيون البعض استهتارهم بأفكارنا وإمكانياتنا، بعد ما واجهنا أهالينا وضغوطاتهم علينا، بعد ما واجهنا المجتمع اللي كانت نظرته إلنا بأنه إحنا لساتنا "صغار" وما بطلع منا أي إنجاز وأهم شي لازم نفكر فيه بنظرهم فقط كان هو دراستنا في المدرسة، وبعد ما انقطعنا فترة طويلة عن أحلامنا وطموحاتنا وصابنا الإحباط والاحساس بأنه فعلا ما رح نقدر نعمل شي من أفكارنا اللي شبه أقنعونا أنها مجرد خيال وكلام على ورق، بعد ما مشينا المسافاااات من منطقة لمنطقة مشي لأنه ببساطة معناش أجار التكسي، وبعد كتير من الأشياء لو بدي أحكي عنهم ما بخلص

بعد سنتين .. ما فقدنا الأمل واستمرينا لحتى قدرنا نحط رجلنا على أول خطوة من طريق النجاح ونأسس أول شركة من #سلسة_شركاتنا ...

#فولنترجي_عمان
زمان كنا مجرد مبادرة شبابية، يعني مش تابعين لأي جهة رسمي، يعني بنظر الحكومة (احنا كنا غير موجودين) وفعلا كنا نعاني لما بدنا نحجز مكان لأي فعالية أو مبادرة أو ناخد أي موافقات رسمية لأنه ببساطة كان أول رد منهم (مين أنتوا ؟؟) واحنا هون كنا نضطر نلفلف عالجمعيات والمؤسسات الخيرية وحدة ورا التانية وكل جمعية تحط علينا شروط أكتر من اللي قبلها، غير عن الأسابيع اللي رح تمر لحتى تطلع الموافقة من الإدارة العليا ...الخ، لحتى نكون تابعين لجهة رسمية .

بس احنا مش زعلانين، بتعرفوا ليش؟! .. لأنه هاي كانت من أهم الأسباب اللي فعلا حركتنا من داخلنا ودفعتنا لحتى نسجل مبادرتنا وتصير #شركة_رسمية، ونبلش أول خطوة حقيقية في طريق أحد أكبر أحلامنا واللي هي سلسلة الشركات .

وحاليا وبما أننا صرنا جهة رسمية وعارفين المرمطة اللي بعيشوها أصحاب المبادرات، فطلعنا بقرار بأنه ندعم أخواننا المبدعين وأصحاب المبادرات والأعمال الخيرية برعاية فعالياتهم ومبادراتهم الخيرية بمختلف أنواعها ومجالاتها، ومساعدتهم بأي أمر يحتاج لأمور وموافقات رسمية

إذا كنت أنت صاحب مبادرة ومحتاج أي مساعدة فلا تتردد بأنك تحكي معنا واحنا ما رح نتردد بمساعدتك قدر المستطاع

فولنترجي عمان بتدعم كل إنسان.

Share on Facebook
Share on Twitter
Please reload

  • YouTube Social  Icon
  • snapcodes
  • Facebook Social Icon
  • Twitter Social Icon
  • Instagram_App_Large_May2016_200
This site was designed with the
.com
website builder. Create your website today.
Start Now