بتعرف تسكت ! - أنس مقدادي

موضوع صار معي , معك , وأكيد مع الكل .. لما تحكي مع واحد بموضوع , بتحسه بتصرف تصرفات كثير كثير كثير غريبة , وأكيد أنت رح تضايق منه .. أنت بتصير بدك تحكيله ولك بكفي بكفي , خلص أسكت .. بس طبعاً ما بنعملها ! لهيك نصيحة مني ولكل حدا بقرأ هالكلام , لا تعمل هالحركات المستفزة , بترجاااااك أول موقف .. الشخص يلي بتكون قاعد معه وبتحكيله شو صاير معك , بتكون بتطلع بوجهة وهو الاخ بتصفن بالدنيا كلــــها .. الا وجهك ! بالمرة بنسى أني بحكي معه , وهو فعلياً مستعد يعد ويحصي عدد الجراثيم يلي بالغرفة وما يطلع بوجهك ! يعني بتحس حالك قاعد مع مديرك بالشغل يلي بالعادة قرفان وما بطلع بوجهك وبحكي من رأس أنفه وبطلع بالورق ومو معبرك , هههه على الاقل مديرك بتستفيد منه بنهاية الشهر وبتأخذ راتب , أما هيك ناس شو مستفيد منهم ! ثاني موقف .. الناس يلي شو ما تحكيلهم بكون صاير معه مثله بس بطريقته الخاصة " سبيشال شوي " وطبعاً المواقف يلي صارت معك هي تافهه بالمقارنة بمواقفه .. مثلاً , مثلاً .. بحكي لصاحبي صار معي موقف خلاني أوقع من أول درجة من فوق لأخر درجة , هو رد عليه أسكت أسكت لعاد ما بتعرف شو صار معي أنا قبل كم يوم وقعت من درج فيه 50 درجة وتشقلبت على طولي كامل وتبهدلت وما وصلت لاخر درجة الا وانا مكسر تكسير ! مثل هيك ناس مستحيل يحكولك سلامتك , الف سلامة عليك ما تشوف شر , زعلتني عليك .. الخ بقاموس مخهم ما في هيك مصطلحات بالمرة , محذوفين .. همه بس عندهم : عادي بسيطة صارت معي وأشهر وحده هاي .. لعاد أسمع شو صار معي أنا ! ثالث موقف .. لما تكون مجرب شغلة وعارف شو عامل , بتيجي تتناقش مع واحد وتحكيله عنها , بحكيلك غلـــــــــط , أنت غلـــــــــط ! طيب ما أنا مجربها وعارف شو بعمل , بتحس هالشخص موجود بمخه خاصية أسمها " التغليط " بحس بسعادة غامرة لما يستخدمها , ويحكيلك أنت غلـــــــــط .. ياخي بامكانك تحكي أنا شخصياً بشوف .. ياخي بامكانك تحكي من وجهة نظري .. ياخي بامكانك تحكي أنا بفضل هيك .. ياخي بامكانك تحكي أنا بقترح عليك تعمل هيك .. هيك رح يتقبل رأيك ويأخذ فيه , أما تيجي تحكيله أنـــــــــــــــــت غــــــــــــــــــــــــــــلـــــــــــــــــــــــــــط ! الشغلة أسلوب بالنهاية , ما رح يأخذ برأيك وبنصيحتك إذا ما كان في أسلوب منيح ومرتب .. هاي من المواقف البسيطة يلي بتصير معي ومع كل حدا بقرأ هالكلام .. أحكيلي شو رأيك بكل موقف ؟ وكيف بتتقبل النصيحة من الشخص يلي قدامك ؟ وكيف بتقدم النصيحة للشخص يلي قدامك ؟