تعليم وطنجرة - أنس مقدادي

على سبيل المثال , إذا حطينا طنجرة على النار وحطينا فيها رز أو برغل , الطنجرة نفسها بتوسع بس 4 كيلو , أنا هون حطيت فيها 8 كيلو , لما أفتح الطنجرة رح الاقي نصها محروق من تحت والنص الثاني مو مستوي منيح ورح يطلع لبرا من كثرة .. طيب شو النتيجة , شو السبب ؟ السبب أنه يلي عملناه غلط , ما استنفدنا من كل هالطبخة باشي منيح .. للاسف هالمنطق يلي بحكي فيه ولو كان بسيط , بس هو تشبيه واضح لكل يلي بصير بمجتمعنا ومدارسنا وجامعتنا , حشو المعلومات بكل واحد فينا رح يعمل بشكل عكسي وسلبي مع الاسف , حشو المعلومات فوق الرأس من دون أستيعاب الفكرة والهدف رح بعمل مشاكل كثيرة بالمجتمع , الطالب لما يأخذ هالمعلومة بدون تغذية راجعة بينه وبين الدكتور أو الاستاذ أكيد ما رح يفهم وما رح يستوعب الفكرة , احنا بنعمل بكل طالب هيك , احنا بنطلع وبننتج جيل من فاهم اشي , وكلمة حافظ مو فاهم هاي 100 ‎%‎ مزبوطة بمجتمعنا , علشان هيك , كل طالب وكل واحد بتلقى معلومة بمجتمعنا العربي تعود على هالحكي , تعود انه التعليم عنا ما بيعطي تعليم , بس بيعطي حشو معلومات وتبرية ذمة من كل مدرس لا أكثر , هي شغلة من هالشغلات يلي بتصير بحياتنا لازم الكل ينتبه عليها , في كثير أسس وشغلات أنا وأنت وأنتي والكل قادرين نبني فيها تعليمنا ونخليه أحسن , مو بعدد الساعات يلي بندرسها , ولا بحشو المعلومات بذهن وبمخ الطالب , لانه النظام يلي عنا هو نظام تلقين تلقين تلقين تلقين .. التعليم لازم يكون اشي بسيط وسلس لحتى يفوت ويدخل بشكل مسلي وسلس كمان , لازم وهاي ضرورية كيير , لازم نفعل التكنولوجيا بتعليمنا , بالقرن الواحد والعشرين صرنا , راح زمن التلقين خلص .. حببوني بالتعليم , خليني احبه .. خلوني أستمتع وأنا بتعلم ..