العنود حدادين ، الأردن
قصتي قصة بنت حبت يكون الها بصمة بين الناس.. ولقيت بين ايديها موهبة يمكن تكون موجودة عند كتير ناس بس هي بالنهاية نعمة من عند الله وفي عالم كتير بتحبها وحابة توصلها بس مش ملاقية الطريق المناسب..
العنود باسم حدادين بنت الاردن وبعدني على مقاعد الدراسة.. موهبتي هي موهبة الحب والاحساس.. موهبة الفن.. موهبة الرقي *موهبة الرسم*
من لما كنت طفلة صغيرة كتير كان يلفت انتباهي الالوان والرسمات واحب ارسم اشياء يمكن ما كان حدا قادر يفهمها غيري.. لحد ما صار عمري ٨ سنين.. بدأت ارسم شخصيات كرتونية بسيطة واحاول انمي الموهبة وكل مرة ارسم شي مختلف ومستوى احلى من يلي قبله لحد ما وصلت لعمر ١٣ سنة ووصلت لمرحلة ارسم فيها رسمات فيها صعوبة واتحدى نفسي ولقيت اعجاب كبير من اصحابي واهلي .. وحبيت اطور موهبتي اكتر واصير ارسم وجوه الناس فسجلت بدورات رسم وزاد مستواي بطريقة رائعة جدا وكتير راضية ومبسوطة عن حالي وعن يلي وصلتله لحد الان.. برسم بالرصاص والفحم.. الالوان الزيتية والوان الاكريليك.. واحيانا بالحبر ... وبيوم حبيت اوصل اسمي لعدد اكبر من الناس وعملت صفحة شخصية عالفيسبوك والحمدلله كانت خطوة موفقة وقدرت اوصل يلي ببالي وصار اسمي معروف اكتر، يمكن لعدد محدود من الناس بس في مقولة دائما بكررها ببالي *ان اردت ان تصعد الجبل فابدأ من اسفله* والحمدلله عم ببدا بمشواري خطوة خطوة...
في معرض المدرسة السنوي كان الي طاولة خاصة بعرض عليها كل رسماتي وكان في اقبال واعجاب كتير من الناس..
كما انه دعيت لمقابلة تلفزيونية في برنامج صباحك يا بلادي على قناة 7 stars بتخص موهبتي بالرسم
طموحي يوصل اسمي لاكبر عدد من الناس.. يكون الي مرسمي الخاص بنتج فيه رسماتي باسمي.. واعمل دورات رسم لحتى افيد غيري.. واستمر بالابداع ليكون الي معارض بعرض فيها جميع رسماتي.
