لما كنت بالمدرسة ما كنت شاطرة وما بحب الدراسة خاصة المواد العلمية ، وكنت دائماً على يقين إنه المدرسة مش المكان يلي بقدر أبدأ حياتي فيه صح زي ما بدي ، ورغم إني كنت أشارك وأفوز بالمسابقات إلا إنه الفتاة الملتزمة بفترة المدرسة بعتبروا إنها مشددة ع حالها وهي عايشة بقوقعة وما رح نقدر نتعامل معها ولذات السبب بأحد الأيام حكت الي مديرة المدرسة أثناء تقديمي للإذاعة المدرسية:" صوتك مش إذاعي..لا ترجعي تقدمي الإذاعة"!
كانت كل الفكرة إني لابسة جلباب ! تركت الإذاعة فعلاً وعزمت أكون زي ما أنا بدي فقط وأحقق كل يلي بحلم فيه ومثل هيك موقف يكون حافز مش عائق، وفعلاً....كانوا الأربع سنين يلي مروا الي بالجامعة تحدي لنفسي قبل الآخرين، ولأنه طموحي أكون صحفية كان لازم أفكر منيح..
دخلت تخصص حقوق بجامعة مؤتة عن رغبة وكان الهدف منه أتعلم القانون وأكسب قوة شخصية تساعدني بهدفي، وبنفس الوقت بحثت بمجال الصحافة وعملت مراسلة لجامعة مؤتة بأول سنة الي مع جريدة أردنية ، وكنت أشارك بدورات وما أبخل على نفسي بما يزيد همتها سواء دورات أو أعمال تطوعية أو غيره ، ورغم إني بحب الرسم والكتابة والتصوير والصحافة إلا انه هالشي ما أثر ع دراستي أبداً وحافظت ع معدل منيح بالجامعة بتخصصي، وكانوا سنوات دراستي هم نفسهم سنوات إنجاز كثير من الأشياء يلي بعتبرها فعلاً انجاز ومنها نعرض تراتيل روح مع الكاتب علي الأحمد يلي فكرته كانت الأولى بالوطن العربي وعملناه بالكرك وجامعة فيلادلفيا والجامعة الأردنية وكان اله جمهوره المميز، وبآخر سنة الي بالجامعة اشتغلت مع قناة اليرموك الفضائية كصحفية بمحافظة الكرك وهيك بعتبر اني حققت خطوة كبيرة بحياتي الحمدلله ^^
بعد التخرج هو عالم مختلف ولازلت مكملة طريقي لحلمي شاركت بدورات مع محترفين بعمان منها دورة صناعة أفلام مع صانعة الأفلام آلاء حمدان وكذلك دورة إعداد وتقديم إذاعي مع أكاديمية حياة أف أم وكان لكل خطوة بعملها تأثير على حياتي، أؤمن انه كل حدا فينا لازم يخصص جزء من حياته لروحه وما تحب القيام به بعيداً عن ضغط العمل والدراسة، ونقطة مهمة رح أعتبرها مسك الختام أعتبر أن قضية الأقصى هي قضية الأمة الأولى لهيك لازم تكون بحياة كل انسان ويعطيها حقها. النوار الشمايلة محامية متدربة مراسلة لقناة اليرموك الفضائية كاتبة ونشرت عدة أعمال في كتب ومجلات منها كتاب أوراق شجر الأول والثاني مصورة رسامة وبتمنى من كل قلبي يوصل كل حدا فيكم لطموحه وهدفه بالحياة، بدون ما يطلع شو بفكروا الناس وشو بدهم الناس والمجتمع، المهم انت شو بدك...
