مروان فليفل ، الأردن
بصراحه ما كنت أفكر بالتصوير ، ولما كنت صغير ، كانت حياتي عبارة عن دراسة و شغل ، بس كنت أحب المناظر و اضوية شوارع عمان وأحب الأزياء .
حبيت يكون عندي طموح و حلم أشتغل عليه ، أتعب وأنا بتعلم عشان أحققْه
في يوم من الأيام قلت خليني أصور ألاشياء الي بحبها ، و بالفعل بديت أصور بالموبايل صورت جامعتي ، و صفحة الجامعة على الفيسبوك أخذت صوري ونشرتها و صفحات تانية صارت تشاركني بصوري .
وهلا صار لازم أطور من حالي و أشتري كاميرا ، إشتغلت وإشتريت أول كاميرا .
طبعاً ما كنت أعرف عليها إشي ، بديت أتعلم وأصور صحابي كل يوم .
صرت كل ما أطلع آخد كامرتي معي ، كنت اطلع من الصبح أرجع بنص الليل و ما كنت أحس ب تعب ابداً ، حبيت الإشي اللي بعمله ، كنت أحاول أسجل ب دورات للتصوير بس وقتي ما يسمح شغل وجامعة ، كنت دايماً أبعت صوري للمصورين المعروفين عشان أستفيد من تعليقاتهم .
و بيوم لقيت كل صور عمان على صفحة رام الله الاخباري و رؤيا و بيج سعودي و كاتبين تصوير مروان فليفل !
مع العلم انا ما كنت أعرف اشي ع الفتوشوب ، يوم بعتت صوري ل الأستاذ #معاذ_السلوادي و شاف صوري و طلب مني إني اتعلَّم ، وبالفعل ، لبيت دعوته ونفذت طلبه وبديت أتعلم على الفوتوشوب .
بعدها ب فترة وقفت تصوير لمدة شهرين ، كل يوم كنت أشوف تصوير الأجانب وأفكارهم .
حبيت أرجع للتصوير بإشي مختلف عن التصوير اللي موجود .
الحمد لله تعلمت و صرت أطبق أصعب طريقة بالتعديل على الفوتوشوب ، و الصورة بالوقت الحالي بتاخد معي ساعتين
الحمد لله ، انا راضي عن صوري و أن شالله راح أصير أفضل مصور أزياء بالعالم
عندي حلم و بسعى لأحققه ...
