إسلام أبو سارة ، الأردن
كأي طالب كانت مرحلة التوجيهي عقبة في طريقه هيك كانت بالنسبة الي بس فعليًا كان مطب خير ..
تأخرت فصل وخلال هالفصل إكتشفت أن إسلام يمكن كان عجبها حرف ال (م) قبل إسم أي مهندسة ، أو يمكن إمتيازات النقابة وفعالياتها ..
بس ما تخيلتْ حالها تقعد ورا مكتب أو تشتغل شغل هندسي .
عرفت تقريبا شو بدي بس المجال يلي كان في بالي عبارة عن بحر واسع لازم أحدد اي طريق فيه .. نويت أدخل لغات لإن اللغات رح تساعدني وتسندلي التخصص الأساسي يلي بفكر فيه ، وكنوع من التأكيد إن أنا بدي هالمجال وقبل ما تطلع النتائج وتأثر على تفكيري بمستقبلي أخدت دورة أساسيات تصوير .
جدًا استمتعت واتأكدت إن إسلام مستعده تقضى باقي عمرها في هاد المجال وتطور من نفسها وتوظف تخصصها الجامعة ليساعدها تتطور بأي طريقة .
فعلا دخلت الجامعة وبعد فترة مش قليلة إشريت كاميرتي الخاصة من مصروفي الشخصي ، وبعد سنة من دورة أساسيات التصوير طلعت وأخدت دورة في صناعة الأفلام في تونس ، هالدورة كانت نقطة تطور بشخصيتي للافضل ، رجعت ، من سنة للآن الحمدلله اعطيت دورتين صناعة أفلام للأطفال بالتعاون مع نادي هاشتات (برنامج التعلم من خلال المشروع ) ومؤخرًا أنهينا دورة تصوير فوتوغرافي للأطفال .
طبعاً ما إكتفيت بالدورات خارج نطاق الجامعة ، حاولت وما زلت بحاول أدمج حبي للتصوير داخل الجامعه فأنشأت بمساعدة وتشجيع عدد من صديقاتي صفحة " حكايا آل البيت " لتكون المنبر لأي طالب حابب يحكي قصة نجاح ، ومشان نثبت ان ما في طالب دخل الجامعة موهوب وإنثرت موهبته أو دخل بأحلام وطموحات وإنكسر !
نوضح الصورة المشرقة للجامعة ونحكي حكايا النجاح فيها بالعربي والإنجليزي والإسباني وقريبا فرنسي وإيطالي .
ي شخص عرف إسلام زمان رح يلاحظ التغيير يلي تغيرته ، الفكرة والنصيحة إعرف وين ماشي وشو بدك ، إذا حاسس إن هدفك كبير كتير وصعب تحققه تخلى عن كلمة صعب وإبدا جزئ هدفك خطوة خطوة بتوصل ..
مافي حد إنولد ناجح ، بس في حد تعب وفشل ورجع وقف لينجح . النجاح ما اله هالطعم إذا إجى عالجاهز بدون تعب ، لهيك إتعبوا إتعبوا لتحسوا بقيمة النجاح .
