رند أبو دواس - الشغف يوّلد الإبداع
- Admin
- 27 ديسمبر 2016
- 2 دقائق قراءة
رند ابو دواس ، الأردن
تخرجت ب 2015 من الجامعه الهاشميه تخصص محاسبه بتقدير امتياز
بلش مشروعي بعد مشاكل واجهتني قررت اطلع حالي منها و أبعد نفسي عن التفكير فيها...
بالبدايه كنت عم بدورعلى اي شي لألهي حالي و باخر سنه جامعه بالصدفه و بعد ما جهزت عيد ميلاد واحد من افراد عائلتي ..اكتشفت اهتمامي بمجال الكيك و تزينو و صار هوس وبرضو كتير بحب المجالات الحره و التجاره و بحلم بشركه او مشروع خاص فيه بيوم على الرغم انو الي حوليه ما كانو مشجعين بالبدايه و شافو انه ما ممكن شغل زينة الكيك ينجح معي ..
و بكل مره كنت فيها بتعرض لموقف ممكن يسببلي احباط متل انه الزبون يعتذر او الناس ما توثق بما انو لسا جديد و حاسيين انهم عم بغامرو ...او اي شي ممكن يحبطني .
كانت كلمة لعلو خير على لساني و عندي ايمان انه رح تزبط و انه لازم كمل!!! بدا مشروعي ب 300 دينار وكان ما بدخل شي بس ضليت شهور على يوتيوب بحاول أطور من مهاراتي و ما اخدت اي دوره بالمجال .. حاليا كتير أطور شغلي من ناحية المهاره و صرت مهوسه اكتر بالتفاصيل .
شغلي منزلياً كتير عليه اقبال و هو قبل ما يكون مشروعي و شغلي هو مصدر تنفيس و فن بحب جرب كل جديد فيه....
طلبوني لمحل اسمو ديفان كيك بعمان و اشتغلت عندهم شيف سكر 3 شهور لحتى اخد خبره اكبر و الحمدلله تعلمت و اخدت الي بدي اياه و لساتني كل يوم عم اتعلم لانو هاد المجال بحر ...
ما وصلت للي بدي اياه و الي هو محل خاص فيه بس مافي شي بعيد انجزت كل هاد خلال سنتين.
انا درست علمي لادخل كلية الهندسه و بتخصص العماره لانو كان عندي مهارة الرسم بس ما حالفني الحظ و دخلت محاسبه و حبيتها برضو و حبي للرسم طبقتو او استخدمتو بشغل عجينة السكر و تخصصي الجامعي مساعدني كتير بشغلة بالحسابات و دعايه لهيك ما بندم او بزعل على اي تجربه مريت فيها لاني عارفه في من وراها فايده و غايه ربنا اعلم فيها .
Opmerkingen