فاطمة البسيس ، الاردن
بديت ارسم من وانا صغيرة متل اي طفل بحب يخربش ويرسم.. بس لما كبرت شوي بطلت اهتم بالرسم كتير . وبطلت احب الرسم مع انو كان عندي موهبة وكثير ناس شجعوني استمر بس كان عندي اهتمامات ثانية. قبل سنة تقريبا فكرت بالموضوع وحكيت مدام عندي موهبة في كتير ناس بتمنوها ليش ما انميها واصير احبها .
وقتها قررت ارجع للرسم وبلشت احضر فيديوهات على النت او انقل عن صور من النت وما كانت تطلع الرسمة متل ما انا بدي.. وابطل. وفعلا مرات ما كنت حتى اكمل الرسمة لانها مش متل ما انا بدي.
وهاد اكتر سبب خلاني ارجع اتراجع عن الرسم. بعدها ابوي بلش يشجعني ع الرسم اكتر ويفرجيني فيديوهات عن الرسم وانا حسيتو كيف بفرح لما يشوف رسماتي اكتر مني وضع يحكيلي اتدرب.
اكتشفت انو في كتير ناس بشجعوني وبنبسطوا من رسماتي وهالشي شجعني استمر واكمل وارسم.. هالشي خلاني ابدأ احب الرسم من اول جديد. معانو وقتها ما كنت بعرف نواع الوان ولا انواع ورق ولا ماركات.. بس الاهم كان حبي للرسم بشو ما كان.
وبعدها شاركت بمسابقة مواهب وانا ما عندي امل انو افوز بس حبيت اشارك لاول مرة بحياتي وفعلا وصلت للمرحلة النهائية الحمدلله .. كانت فرحة كبيرة بالنسبة الي! صح ما فزت بالمراكز التلات الاولى وانا راضية لاني ما تعبت ع موهبتي متل غيري وما قدرت موهبتي متل غيري ومن يومها بلشت اتطور بشكل هائل لانو صار عندي #طموح وارادة وبديت اتعلم اكتر عن الادوات وبلشت احب الاوان كلها وبشعر بسعادة بس ارسم. هي موهبة وراحة وسعادة وبديت اجرب طرق جديدة في الرسم وارسم ماندلا وبلشت برضو بالخط العربي واكتشفت انو الفن كلو بجميع اشكالو بيسعدني . ما في شي سهل بالبداية.. لازم تتعب عشان تطور.. ويكون عندك ارادة وبسبب الارادة وحبي لموهبتي انجزت كتير خلال سنة وحدة بس. اذا عندك موهبة حبها واشكر ربك عليها ونميها .
