منية الشوبكي ، الأردن
تصميم الأزياء شغف الأزياء موجود جواتي من و انا صغيرة ، كانت عندي هواية في فساتين (الباربي) رسمهم ، زياده قطع عليهم و تزينهم ، بالاضافة ل الاكسسوارات كنت مغرمه بفكره أني افكهم و ارجع اعمل منهم تصميم تاني و ضل هالحب موجود جواتي لليوم ، وقتها كان أكتر شخص يشجعني و مأمن بموهبتي ماما (يرحمها ربي) كانت تحكيلي أنا شايفه فيكي شخص ناجح .
من سنتين بلشت أشتغل ع الموضوع أسجل بدورات ، معاهد و ما زلت لحد الآن ، برسم تصاميم في أوقات الفراغ باخد رأي أكتر من شخص ، ألبس قطعه معينه عندي ب أكتر من ستايل مختلف عن الي قبلها ، و أصمم قطع خاصه فيّ ، مع إنه كان نفسي أدرس بالجامعه تصميم أزياء بس ما كان متوفر هاد التخصص وقتها و مع ذلك هاد الشي ما وقفني أبداً .. لو الظروف الي حوالي ما ساعدت و كتير قصص حاولت توقفني و تحبطني و منهم أشخاص سلبيين كمان ، بس كملت و بلشت بمشروع صغير اسمه (SAMRA-سَمْرآ) و من هون بلشت اول خطوات الحلم و بلش يتحول لواقع شوي شوي الحمدلله ، (سَمْرا) راح يكبر و راح أحقق نجاح كانت ماما شايفته جواتي ، حلو الإنسان يكون عنده طموح ، حلم ، هدف ، بس الأحلى إنك تسعى ورآه و تثابر مشانه و تتحدى جميع الصعاب إليّ بتمرق فيها .
