هيا العطيات - الرسم الواقعي

هيا العطيات ، الأردن

بتذكر وأنا بالصف الثالث رسمت رسمة بسيطة جداً.. معلمتي وقتها أخدتني لعند المديرة لتفرجيها رسمتي؛ وقفِتي بهداك اليوم ما بنساها كيف أثنت علي وشجعتني جد شعور خرافي.. وكيف معلمة تانية رشحت إسمي من ضمن أول الأسماء لحتى أشارك بالمجلة المدرسية المكتوبة بخط الطلاب كونه برأيها خطي مرتب ومفهوم بالمقارنة مع الأطفال بعمري .. ومن وقتها محبتي للرسم زادت يوم عن يوم وبدأت أرسم كتير وأجهز دفتري وألواني وأرسم شخصيات كرتونية من التلفزيون والمجلات والقصص.. بشوف بعيون غيري الإعجاب برسماتي وهاد بكون بحد ذاته دافع إلي للأمام .. لهدف الإحتراف والتميز بهالمجال إن شاء الله ..

في موهبة بكل شخص أو بالأحرى بكل طفل بداخلنا مش بالضرورة تكون عالمية أو بمستوى كتير متقدم بس على الأكيد إنه بكلمة تشجيع وثناء بتتجذّر بتنمو وبتكبر وما بتموت حتى لو تركناها ورجعنالها بعد سنين ..

إشي عادي نحوّل الشمس لبقعة صفراء لحتى نقدر بعدين نحوّل البقعة الصفراء لشمس ..

الكلمة الإيجابية كلها خير لا تبخلوا بقولها لبعض..