رنا مساعدة ، الاردن
درست علم حاسوب في جامعة البلقاء واشتغلت بعد تخرجي بمجال دراستي ، بكل لحظة كنت أحس إنه في شي ناقصني بحياتي ، إشي بحبه وبستمتع فيه ورجعت بذاكرتي لطفولتي وتذكرت حالي لما كنت أطلع على الكرسي والطاولة بالمدرسه عشان أرسم على الحيطان رسمات مختلفه والكل يحكيلي إوعي توقعي وأحكيلهم " اللي ماسك الالوان الي بحبها ما بخاف وبسعى للمكان العالي "
كنت أستمتع بخلط الألوان. وأضل استنى حصة الفن عشان أرسم أو أعمل أي اشي فني .
كانوا المعلمات دائما يحكولي إنه عندي حس فني لازم أطوره ...وبعدها قررت أبدأ خطوة بالمجال الي بحبه وفعلاً اشتريت أدوات الرسم ومرسم والوان وفراشي وبديت أرسم وشوي شوي بديت أحس إنه الطفلة الي كانت تحب الرسم كبرت وصار لازم تنمي موهبتها...
بالبدايه الكل من أهلي وصاحباتي تفاجئوا إنه معقول رنا بترسم ؟؟ وحكيتلهم راح تتفاجئوا أكتر وأكتر ...وقررت بعدها التحق بمركز مختص بالفنون التشكيلية ...
أولها خفت وكنت أقول معقول أقدر أرسم لوحات مثل الفنانين ؟ تحديت نفسي وبديت أرسم وأتعلم وأتابع وحتى اأحمل تعب الشغل وتعب التركيز بالرسم والجهد ، كله عشان اوصل للي بدي ياه وفعلا بعدها بديت أول خطوه ، انه شاركت بحلقه تلفزيونيه ببرنامج معروف ورسمت على الهواء مباشره وكانت حلقة مميزة ، بعدها تعرفت على فنانين كبار بالفن التشكيلي ودعوني اشارك بمعارض أردنية وعربية وبكل معرض صرت أتعرف على فنانين اكثر واتحمس اكثر واتعلم منهم الاحساس بالفن وانه الفن علم ورسالة ورقي ومسيرتي ومشواري الفني طويل
وراح اسعى انه كل يوم اتعلم شي جديد بالفن وان شاء الله اتفوق اكثر وأوصل بالفن لكل شي بحبه والفن عالم كامل من السعاده اللي ما بشعر فيها الا كل من يملك احساس الفن والريشه و الالوان الي بتعبر عن كل ما بداخله ومشواري ابتدأ ناجح. والحمد لله وان شاء الله من نجاح لنجاح اكبر .
المعارض الي شاركت فيها :
1.معرض قطرة حياة
2.معرض وتر ولون لمجموعة كونتراست للفن التشكيلي
3.معرض نجوم مضيئه الدولي
4.معرض ملتقى ربيع الفن الأول لمجموعة ربيع الفن
5.معرض سنابل الشمس لمجموعة كونترست للفنون التشكيلية
وانا هلأ عضو بمجموعة كونترست للفنون التشكيلية وعضو في مجموعة الفنانين المبدعين الأردنين
