بثينة هاني أبو ريشة ، الأردن علم نفس— سنة ثالثة —الجامعة الأردنية هوايتي : القراءة والكتابة.
رح أحكي عن فترة تعتبر من أهم الفترات اللي بيعتبرها الشخص مهمة في حياته خاصة إنها متعلقة بمستقبله وهي مرحلة التوجيهي كنت طالبة مجتهدة فقررت أدخل تخصص علمي بناء على قراري أنا فالكل بفترتها كان يحفزني ويتوقع مني أداء عالي خاصة عائلتي لكن الصدمة إنه ما حالفني الحظ زعلت واسودت الدنيا بوجهي مع هيك استمر الدعم من الأهل والأصدقاء المقربين وعدت المادة مرة ثانية في الفصل الثاني وكمان ما حالفني الحظ فيها...
هووون... قررت أخذ قرار مصيري وصرت أحكي شو رح تعملي يا بثينة؟
قعدت مع حالي وفجأة طلعت أحكي لأبوي يابا أنا رح أعيد توجيهي بالبيت بس مش علمي رح أعيد ITT ؟؟؟!!!
طبعا أبوي انصدم لأن كان يوم من الأيام راسم معي حلمي إنه يشوف بنته ويشاركها حلمها اللي بتطمحله ويفتحر فيها قدام الكل
المهم بعدها رحت وحولت ما بخفي عليكم النفسية اللي كانت بالحضيض الشي الوحيد اللي كان يطلعني من هالحالة هو إنه كنت أتخيل حالي في مكان مهم يومين من الأيام والكل يسمعني وينبهر في اللي بحكيه
المهم بعد هذا المشوار الحمد لله نجحت بمعدل متوسط ودخلت الجامعة.
لما قررت إني ادخل للجامعة كنت محتارة بين ثلاث تخصصات وهي الصحافة والإعلام لكون والدتي دارستها فكانت من المشجعين لإلي وخاصة بسبب الخواطر والكتابات العبثية اللي بكتبها....
اللغة الانجليزية لأنه مشكلتي إنه بفهم إنجليزي بس لما بدي أحكي مع أي حدا بفوت بالحيط .
علم النفس لأن هو علم بتحتاجه بكل مرحلة من مراحل حياتك وللأسف في صورة خاطئة عنه فكنت حابه أغيرها وأعدلها.....
اللي بدي احكيه هون وخاصة في هاي الفقرة إنه عنجد لما تضيق عليك الدنيا وتحكي يارب وتكون مؤمن وصادق من جواتك بالإضافة إنك اشتغلت وتعبت على حالك صدقني رح تلاقيه....
الحلو في الموضوع إنه قبل ما أسجل في الجامعة الأردنية إجى تلفون لأبوي مفاده مبررروك بنتك حصلت على منحة بنسبة 700% في دورة التوفل بالاضافة لثلاث دورات من اختيارها فهذا سهل علي الخيار ما بين صحافة وعلم نفس ... صحافة وإعلام تخصص مش موجود بالأردنية فاخترت بكل حب ورضا علم نفس وكنت سعيدة لأبعد الحدود.....
من المهم اللي شخصيا إنه في كل مرحلة من المراحل اللي بخطيها أتذكر مرحلة الفشل لحتى أنجز وأحقق حلمي.
الحمد لله اشتغلت على حالي في دراسة علم النفس ورافقت زملاء بيدعموني فكانت نتيجتي جميلة جدا وكان معدلي 3.45ّ
فقررت أتوسع أكثر وأطور من نفسي أخذت دورات متنوعة في مجال التنمية البشرية دورات في التفكير الإيجابي شهادة في مؤتمر للأطباء والأخصاء النفسيين وغيرها الكثير وما زلت أطمح للأكثر..
خضت في مجال التطوع لأكثر من مبادرة فكان شيء جميل بحياتي إنه ادمجه مع تخصصي وبكفي ضحكة صادقة منهم تخليك مبسوط وروحك بتفرفح من جوا....
مش مهم تعرف مين بثينة وإنجازاتها المهم من كل كلامي هذا إنه اوعك بحياتك توقف في أي مرحلة واجهت فيها عائق او حاجز وتذكر إنه تعمل بهاي المقولة "تقبل الفشل وامضي قدما"
نصيحتي لكل شخص بيقرأ تجربتي إنه تتذكروا هاي النقاط وتشتغلوا عليها كثير منيح : 1. الفشل أولى مراحل النجاح 2. عليك وضع خطة بديلة في حياتك 3. قارن نفسك بنفسك 4. اعرف قدراتك 5.تحدى مخاوفك ونفسك لتصل. 6. آمن بالخيال لأن كل فكرة طبقت كانت بالأصل خيال. 77. اعمل حتى تصل.
انا اليوم حلمي ما وقف ومشواري ما خلص صح لساتني سنة ثالثة في علم النفس إلا إنه بطمح بالمزيد.
هاي تجربتي ما بين الفشل والنجاح.