تسنيم الشيخ، الأردن
درست في الجامعة الهاشمية تخصص إدارة أعمال وهلأ بشتغل في بنك الأردن ومنظمة لدورات في مركز لتعليم اللغة الإنجليزية و حاليا بكمل دراستي في دبلوم التسويق الرقمي في الجامعة الألمانية الهدف من إني قررت أسجل في الدبلوم هو كيف أبني مشروع خاص فيي عن طريق Websites & social media، وكيف أطور من مشروعي بأقل التكاليف والجهود الممكنة. والسبب وراء دراستي هو مشروعي الخاص Adam's Bites للحلويات والحفلات الصغيرة بداية مشواري كان مجرد انه بحب الأكل وبحب أطبخ وأطعمي الناس من أكلي.. شوي شوي صار في تشجيع من أهلي وأصدقائي إني أكمل في هاد الطريق لحد ما صرت أشتغل من البيت وأبيع وهلأ صار عندي مشاركات كبيرة بEvents مختلفة كل فترة والحمدلله ..كل يوم شغلي عم يكبر بزيادة والناس صارت تعرفني أكتر وتحب تشتري من عندي، الموضوع صعب وابدا مو سهل وفي ضغط كبير بأني أتحمل مسؤولية كاملة من نظافة الأكل، نوعية المكونات، الأسعار، الترتيب، وحتى أدق التفاصيل بأني أوصل الطلب على الموعد من دون أي تأخير، فترة ضغط كبيرة علي بس مبسوطة إني بدافع عن حلم أنا بدي إياه وشعور حلو لما تحس بالإستقلالية وإنك بتدرس وبتشتغل على مدار اليوم وبتساعد غيرك ومعتمد على حالك.. لأنه للأسف ظروف الحياة صعبة وصار لازم برأي كل واحد فينا يلاقي نفسه بشي يبدع فيه ويعيش منه ودائماً عندي فكرة إنه ربنا ما خلقنا عبث إنما لسبب وما في شي بحياتنا مستحيل الفكرة كلها ببساطة بحاجة لإرادة وإصرار وثقة بنفسك إنك بتقدر تكمل للنهاية حتى في أصعب الأوقات والأهم من هيك ثقتك وحسن ظنك في ربنا إنه رح يعطيك كل شي بتتمناه بس اسعى وحاول ومعلش لو فشلت مرة ومرتين وتلات وحتى عشرة إذا عندك ثقة وإيمان كامل في الله رح ترجع توقف من جديد وتتحدى حالك إنك بتقدر تحصل على الحلم إلي بدك إياه ~ والبركة في الرزقة ما بتيجي غير من نيتك النظيفة إنه فلوسك قد ما كترت ما بتغيرك والمفروض تنصرف في المكان الصح وتعطي منها المحتاج وغير المحتاج وقتها رح تفهم بركة الصدقات وكيف ربنا بباركلك في رزقتك وبزيد منها بس ما توقف وتحكي أنا ما بقدر أنت بتقدر لما بتقرر وكل إنسان عمل بجد وبضمير رح يلاقي نتيجة تعبه بأقرب وقت إن شاء الله خلال شهر بعد الانتهاء من الدبلوم رح أعلن عن مشروعي بشكل كامل وأوسع على Social Media مع التفاصيل لكل المنتجات الي عندي ورح يكون في أول بأول توصيل للطلبات، وبإذن الله قبل منتصف 2017 رح يتم توظيف شخصين في Adam's Bites سواء طلاب جامعات أو خريجين كعمل إضافي لمساعدتي في التفاصيل اليومية للطلبات وال Events ولأوصل مفهوم إنك بتقدر تدرس وتشتغل وتعتمد على نفسك لما أنت بتقرر ولما ثقتك في ربنا بتكون كبيرة وأنا ما بكون وصلت لهون وما رح أوصل لحلمي غير بفضل ربنا الحمدلله وبفضل أمي وتشجيعها ومساندتها ودعمها الدائم وكلامها الي برفع المعنويات وطبعاً أهلي وأصدقائي جميعا الي دائما جنبي ومنهم بستمد قوتي.
